Тыдзень беларускай мовы і літаратуры (09.10-13.10.2023)
Шануйце дзіва на планеце -
Святую нашу Беларусь.
І мову Коласа, Купалы
Вы беражыце з роду ў род.
Алесь Ставер
Менавіта пад такім дэвізам прайшоў першы дзень Тыдня беларускай мовы і літаратуры.
Для вучняў 5 класа была праведзена гульня “Прыказкі і прымаўкі беларускай мовы”. Навучэнцы пераканаліся, што прыказкі і прымаўкі - гэта ўзоры ведаў пра жыццё, аб народных паданнях і ідэалах, маральных асновах, якія прыдумалі людзі. Дзеці праявілі цікавасць і павагу да мастацкай спадчыны беларускага народа.
Вучні 7 класа ў конкурсе “Чароўны абрус пытанняў і заданняў” прадэманстравалі веды ў галіне вуснай народнай творчасці, мастацкай літаратуры, культуры, па лексіцы і фразеалогіі.
Мова — гэта вялікі народны скарб.
Яе нельга не паважаць, як нельга не паважаць родны народ.
І.Мележ
10 кастрычніка вучні 5-10 класаў прынялі ўдзел у першым этапе алімпіяды па беларускай мове і літаратуры.
Для васьмікласнікаў была праведзена інтэрактыўная гульня “Знаўцы беларускай мовы”. Удзельнікам былі прапанаваны конкурсы, якія садзейнічалі развіццю пазнавальнай і творчай актыўнасці, узбагачэнню слоўнікавага запасу, павышэнню цікавасці да роднага слова.
Вучні 6 класа з захапленнем прымалі ўдзел у квэсце-гульні “Найвялікшае сонца – мая беларуская мова”. Мерапрыемства спрыяла выхаванню цікавасці да роднай мовы, яе вывучэння, развіццю творчых і інтэлектуальных здольнасцей школьнікаў, моўнаму чуццю.
Мова, прыгожае пісьменства, паэзія, музыка ‒ сродак сувязі між душамі людзей, вышэйшы сродак.
Уладзімір Караткевіч
11 кастрычніка для вучняў 8 класа была праведзена конкурсная праграма “ФЭСТ” (фальклор, этнаграфія, спадчына, традыцыі). Васьмікласнікі даведаліся шмат новага і цікавага пра свой родны край, беларускую культуру, вусную народную творчасць, абрады і народныя традыцыі.
Навучэнцы наведалі школьную бібліятэку і пазнаёміліся з вершамі паэтэсы Эдзі Агняцвет, якой споўнілася ў гэты дзень 110 гадоў з дня нараджэння.
Дзесяцікласнікі прынялі ўдзел у конкурсе “Літаратурнае лато”, у якім праверылі свае веды па творах беларускіх пісьменнікаў, праявілі цікавасць да творчасці класікаў.
Ад прадзедаў спакон вякоў
Мне засталася спадчына;
Паміж сваіх і чужакоў
Яна мне ласкай матчынай.
Янка Купала
12 кастрычніка вучні 9 класа прынялі ўдзел у турніры “Матчын скарб”, пашырылі ўяўленне пра гісторыка-культурную спадчыну і моўнае багацце беларускага народа, нацыянальныя традыцыі.
Для дзесяцікласнікаў быў праведзены літаратурны альманах “У неўміручай памяці народнай”. Вучні прачыталі вершы беларускіх паэтаў, прысвечаных тэме Вялікай Айчыннай вайны. Мерапрыемства спрыяла фарміраванню ў навучэнцаў актыўнай жыццёвай пазіцыі, каштоўнасных адносін да гісторыі Беларусі, выхавання пачуцця адказнасці за будучыню сваёй краіны.
Рабі нечаканае, рабі, як не бывае, рабі, як не робіць ніхто — і тады пераможаш.
Уладзімір Караткевіч
Такім дэвізам завяршыўся 13 кастрычніка Тыдзень беларускай мовы і літаратуры. Вучні 6 класа сталі актыўнымі ўдзельнікамі конкурсу знаўцаў “Цудоўная сямёрка”. Падарожнічаючы па тэматычных станцыях, навучэнцы
паглыбілі веды па роднай мове і літаратуры, стварылі інтэрактыўнае воблака любімых беларускіх слоў, пераканаліся, якая мілагучная і цікавая родная мова.
Праведзеныя мерапрыемствы садзейнічалі папулярызацыі беларускай мовы, павышэнню цікавасці навучэнцаў да творчасці беларускіх паэтаў і пісьменнікаў, развіццю творчых здольнасцей школьнікаў.
Тыдзень беларускай мовы і літаратуры спрыяў выхаванню ў вучняў нацыянальнай свядомасці, патрыятызму і любові да Радзімы, захаванню мовы як культурнай спадчыны беларускага народа.
